ما لا تعرفة عن السيارة الكهربائية

ليه؟ مش عشان البنزين كان أفضل، بالعكس، العربيات اللي بتمشي بالكهرباء كانت أنضف للجو وسرعتها مناسبة لطبيعة الشوارع وقتها وأسهل في التحكم

أما العربيات اللي بتمشي بالبنزين كانت صعبة في التعامل في البداية، وكان اللي بيسوق بيطلع عينه لما كان بيبدل غيارات، او حتى يطلع بالعربية في البداية، ده غير التلوث اللي كانت بتسببه

أمال ليه اختفت العربية الكهربا!

ببساطة، لأن الكهربا ماكنتش واصلة لأماكن كتير في الوقت ده، فكان صعب شحنها. كمان كانت سرعتها أقل من البنزين، واحنا بنتكلم في سنة 1930 مثلا، يعني كانوا يعرفوا خلاص يعني ايه طرق سريعة .. فمع الأسف ورغم كل مميزات العربية الكهرباء، قدرت العربية اللي بتمشي ببنزين تتفوق عليها وتتطور في الوقت اللي العربية الكهرباء كانت بتختفي فيه عن الأنظار.

طب، وبعد السنين دي كلها، رجعت تاني ليه وازاي؟

لأن ده وقتها المناسب جدا، تعالوا نعرف ليه …

1- بتحافظ على البيئة:

طبعا كلنا عارفين ضرر مخلفات البنزين على البيئة صح؟

طب ايه رأيك في عربيه مابتطلعش مخلفات ولا ناوية، كل حاجة فيها أصلا بالكهربا، لا بتحرق ولا بتمشي بقوة الدفع ، عشان كدة في المقارنة دي بالذات .. العربية الكهربا تكسب فيها من كل النواحي.

2- توفير فلوس التفويلة

البنزين غلي البنزين رخص وهاتك لف في دايرة واحدة وبعبع بيخوفنا كلنا مع العربيبات اللي بتمشي بالبنزين أو بالغاز حتى، ده غير إن أوقات كتير مابتلاقيش البنزين اللي محتاجة لعربيتك في أي بنزينة، فبتضطر تستنى أو تشتري بالغالي عشان تقضي الكام مشوار

العربية الكهربا بقى، الموضوع فيها أسهل كتير، كل الحكاية هتوصلها بالكهربا تشحن وخلاص كدة

بس … هو الموضوع ده فيه مشكلتين كدة:

الأولى: ان عدد محطات تزويد الكهرباء اللي فيها شحن كهربا للعربيات قليل، وده عشان العربيات الكهربا مش كتير ودلوقتى البنية التحتية شغالة بقوة

ولابد تعرف ان الأصل فىشحن سيارتك الكهربائية ((المنزل)) ومن أي فيشة كهربا في أي حته في الدنيا عادي، عارف. الموضوع أشبه بشحن التليفون

طب والمشكلة التانية؟

إن العربية بتاخد وقت شوية لحد ما تشحن، مش زي تفويلة البنزين في خمس دقايق يعني في البنزينة مثلا الشحن بيكون سريع فبياخد من تلت او نص ساعة، التشارجر بس هو اللي بيطول بزيادة، يعني ممكن يوصل لـ5-8 ساعات

بس خلينا نتكلم بصراحة، ده مايعتبرش العيب اللي يمنعنا من تجربة العربية الكهرباء، لأن لو حسبنا التكلفة وكان عندنا حبة وقت زيادة عاملين حسابنا فيهم عشان شحن العربية، مش هتبقى أزمة

يعني مثلا، 30 دقيقة في البنزينة لو شربنا فيهم فنجان قهوة واحنا بنفصل من اليوم، أو خلصنا فيهم قعدة متأجلة بقالها كتير! .. مش ده مفيد برضة وحل ممكن نعمله! وده طبعاً لما تكون مسافر او مضطر تشحن سريع من الطريق.

والـ 6 ساعة على لشاحن، انت بتركن العربية أكتر منهم، فلو كل مرة بتركن العربية تحت البيت أو قصاد الشغل أو في الجراج عشان تاني يوم أجازة، وصلت فيهم العربية بالشاحن بتاعها، تبقى اتحلت.

ودايماً لاحظ ان العلم كل يوم في تطور، فـ لو دي البداية بس فالموضوع لذيذ ولسه مايقفلناش خالص .. العربية حلوة وتستاهل وبكرة فيه حلول اكتر.

3- سواقة أسهل

نيجي بقى للكلام الحلو ..

عارف انت احساسك لما تبقى سويق قديم ومجرب دبرياج الفرامل اللي بيورم الرجل ده؟ .. ولا غيارات المانيوال اللي بتوجع الأيد!

ونقلات الاوتوماتيك لو عربيتك أوتوماتيك! .. وحاجة اخر وجع قلب.

في العربية الكهربا بقى، هنلقب لإعلان درجة تالته ونقولك وداعا للقلق المستمر وأهلا بالراحة والسلاسة

ماهي عربية من غير جيير بالشكل التقليدى/ ولا عصاية فيتيس، يعني حرية على الطريق وطريقة سواقة جديدة مريحة أكتر ومفيهاش تشتيت.

4- عدم وجود صيانة غير في اضيق الظروف

يعني تربيط عفشة وظبط هوا العجل وشكراً اما الصيانة اللي بالك فيها ورايح التوكيل وجاي من التوكيل خلاص انتهي ، مافيش عندك اصلا موتور ولا فيتيس ولا زيت ولا بوجيهات ولا سيور مش مصدق؟؟ لا صدق ولا شكمان ولا عادم…

يعنى ببساطة عندنا اكتر من حاجة نوفر بيها فلوسنا غير وجع الدماغ مع التوكيلات او الميكانيكي. وسواقة اسهل وراحة وهدوء. اشوفكم البوست اللي جاى.